噓．．．有驚無險

早排黑氣一浪接一浪，真係好唔開心！成日諗：黑氣纏身何時了?
早幾日，去拜祭我爺爺，順便訴下苦．．．
呢幾日，風平浪靜，可謂雨過天晴．．．仲以為係．．．

其實都仲係幾黑就真．．．
今日渣車返工（又係返工時間．．．），出左停車場之後，咦？架車怪怪的呢？架車好似跳下跳下咁，搞到我都唔敢開得太快，返到公司先知道，原來爆左尾軑。噢，ｍｙ　ｇｏｄ！條軑換左唔夠一個星期架咋！！！
月頭開工，當然有ｄ例行公事要辦。做完之後，以為搞掂之際，弊！唔記寫日期添，好在發覺得早，唔係ｄ野出左街就煩．．．
臨尾以為可以順順利利，夠鐘收工果陣．．．大穫！跌左公司ｄ野添，搵唔番都唔駛旨意有得收工！好在唔駛幾分鐘就有同事幫我搵番．．．噓．．．有驚無險

無可置疑，我呢排真係好鬼死黑，認真唔到我唔信邪！但係唔知係咪心理作用，黑起上黎，亦未至於衰到貼地，總算到最後都係化險為夷（架車雖然爆左軑，都挨到返公司．．．補番條軑都係幾十蚊姐）。你話我唔黑咩？又唔係喎；話我好黑咩？我又好似幾好彩咁喎！

原來事情是好是壞，並唔一定可以客觀咁去下判斷，亦都好是乎主觀既你點諗。